Joh 19 | MHL | STEP | Ne aria Pailat-ke Yeesus wi ami mua wapena-pa wiar wuak. Ne wis-ke saru-pu-puukamik.

John 19

1 Ne aria Pailat-ke Yeesus wi ami mua wapena-pa wiar wuak. Ne wis-ke saru-pu-puukamik. 2 Ne ifar suusa nain aawep wasiep ikiwosa-pa orowawamik. Naap onap mia suuwowa oka mia-pa korinowamik. 3 Ne ekap maakem-ikemik, “Oo maneka, wi Yuuda owow saria maneka!” Neemi ifan epepiria aawem-ikemik.

4 Ne Pailat-ke nainiw orop wi Yuuda wia maakek, “Ni miimeka, yo mua fain poromkun urufeka, yo pina-ko me wiar imenam.” 5 Ne Yeesus ifar suusa woosa-pa orowawamik nain ne konim oka maala feekiya owaruma orok. Oraeya Pailat-ke wi Yuuda wia maakek, “Aakisa mua makena urufeka!” 6 Wi pris woos mua ne wi tempel ami mua wi unowiya Yeesus urufap faremi maemik, “Patot wareka! Nomokow moke-pa uminok!” Ne Pailat-ke wia maakek, “Ni niena aawep patot wareka. Yo o opora-pa wuowa nain pina-ko me wiar imenam.” 7 Naeya wi Yuuda-ke maakemik, “I sira naap ikua, mua naap nain uminok, moram Mua Maneka Muuka-ke wame naek.” 8 Ne Pailat nain miimap manek akena keker opap nainiw koor kemena ikiwep Yeesus nokarek, “No kaaneke imenaren?” Naap maakek nain opora-ko me kiripak. 10 Ne Pailat-ke maakek, “Yo opora-ko me kiripominan-i? Yo-ko efa amisaren-i? Yos-ke maemkun eliw nefa piipuikuan e nomokow moke-pa patot nefa warikuan.” 11 Ne maakek, “Mua Maneka ae me nefa nainon-na yo sira kamenap efa onowa nain no kekanowa marew akena. Naapeya mua eena no wapena-pa efa wuak nain pina manek akena onak.”

12 Naapeya Pailat opora naap miimap Yeesus piipuekam naep era akupak-na wia, wi Yuuda-ke sisewaremi faremik, “No piipuinen nainan-na i maiyen, no me Siisar womar-ke! Mua yo saria maneka-ke wame naiya nain Siisar iiwua-ke!” 13 Ne Pailat nain miimap wia fareya Yeesus epa maneka amaporomik. Epa nain unuma “Nomon Esimsa” naimik. (Ne wi Iibru feenap unufimik, “Gabata.”) Ne Pailat pun orop ona anim onom maneka pokow maa-pa pokak. 14 Pasowa onowa uurik ona naap kererinon. Ne aakisa feenap nain unun ama aawem-ikaeya Pailat-ke wi Yuuda wia maakek, “Niena saria fanek!” 15 Nain miimap faremi maemik, “Amapikiwe, pikiwep nomokow moke-pa patot ware!” Ne wia nokarek, “Niena saria nomokowa-pa patot warinen-i?” Naeya wi pris woos mua-ke maakemik, “I saria oko-ko me ikua, Siisar waisow yiena saria-ke!” 16 Ne Pailat-ke Yeesus wiena wapena-pa wiar wuak, wi ami mua-ke nomokow moke-pa patot waruk naep. Naeya wi Yeesus aawep pikiwemik.

Yeesus nomokow moke-pa patot waremik

(Matiu 27.32-44, Mak 15.21-32, Luk 23.26-43)

17 Yeesus ona nomokow moke akuawowa suuwap epa oko “I mua woos oona” naimik nan pikiwemik. (Iibru opora-pa “Golgota” naimik.) 18 Ne epa nan nomokow moke-pa patot waremik. Mua wiam erup pun patot wiarep Yeesus oko-okaiwi-pa wia wuamik. 19 Opora fain iiriw Pailat-ke wia maakeya siisimep-puap Yeesus woos erekina-pa sererimemik, feenap siisimemik, “NASARET OWOW MUA YEESUS, WI YUUDA SARIA MANEKA.” 20 Wi Iibru, Rom ne Grik opora-pa siisimemik. Aria Yeesus sererimemik epa nain owow maneka mamaiya-pa ikua. Naapeya mua unowa soomaremi siisimowa nain urufam-ikemik. 21 Ne wi pris woos mua-ke ikiwep Pailat maakemik, “No moram ‘wi Yuuda saria maneka-ke’ naap siisimon? Weetak, no feenap siisime, ‘Mua fain ona maek, “Yo wi Yuuda saria maneka-ke,” ’ naap siisime.” 22 Ne wia maakek, “Opora nan siisimem, naap akena ikainok.”

23 Wi ami mua-ke Yeesus patot warep-puap mia suuwowa wiar sererkap mua erepam naap maa kuisow kuisow aawemik. Ona mia suuwowa maala nain pun wiar aawemik, nain warow epasuma marew, iriniya onamik. 24 Naeya maemik, “I fain me perekiyen,” naap maep maemik, “satu niirep mua naareke nomakep-na os-ke aawinok.” Naeya Mua Maneka opora maek nain iiwawun pepek erowawamik, feenap,

“Yena mia suuwowa efar sererkap aawemik ne mia suuwowa maala nain satu niirep mua oko-ke efar aawok.”
(Someka 22.18)

Wi ami mua-ke sira nain onamik.

25 Ne Yeesus ona onak, ne onak oko, ne Klopas emeria pun Maria, ne Maria oko, ona owowa Makdala, wi naap o mamaiya-pa iimarep ikemik. 26 Ona teeria mua oko, o mua nain senam akena kookaliya, os pun mamaiya-pa nan iimarep ikua. Ne Yeesus-ke urufami onak maakek, “Aite, mua fain muuka nae.” 27 Onak maakep-puap mua nain maakek, “Emeria fain aite nae.” Naeya mua nain-ke Maria aawep ona koora pikiwep kakaltam-ikua.

Yeesus umok

(Matiu 27.45-56, Mak 15.33-41, Luk 23.44-49)

28 Aria maa muutitik nain weesereya Yeesus amisarek, aakisa uuwowa iiwawun welawam naek. Neemi Mua Maneka opora nain pepek erowami maek, “Yo kema enekariyem.” 29 Eka masia amina-ko nan ikua. Naeya maa oko wauroma aawep eka masia-pa suuwap kuuma-pa kokor erowap opaimika-pa wuomamik. 30 Aria Yeesus nain enep weesereya maek, “Aakisa uuwow kapa welawam!” Naap maep imakuna sekumaremi umok.

Ami mua-ke Yeesus kametkura-pa mikak

31 Pasowa enowa onowa nain maa muutitik saliwap uurik ona-pa onikuan. Ne Sabat nain pun manek akena-ke. Naapeya Sabat-pa sawi napuma nomokowa-pa naap me sererep ikauk naep wi Yuuda-ke Pailat nokaremik, mua-ko wia sesekeya ikiwep meren oona wiar ititiwkin ewur umiwkin wia iiraruk. 32 Naeya ami mua-ke ikiwep mua erup nain oko merena wiar ititap-puap ekap oko. 33 Ne Yeesus merena wiar ititu naep urufamik-na o iiriw umok. Umeya naap me onamik. 34 Ne mua oko-ke ona wiowa opap ikua nainiw Yeesus kametkura-pa mikeya aka eka asia onaiya fuok. 35 (Aria mua ona urufak nain-ke opora fain siisimok. Ne o fain maek nain makena. Ne ona wame maek, “Yo maem nain makena-ke.” Naeya nis pun makena-ke naeka.) 36 Aria Mua Maneka opora makena arinok naep maa unowa nain imenaromakek. Opora feenap,

“Oona ara kuisow me wiar ititikuan.”
(Eksodas 12.46, Someka 34.20)

37 Ne opor oko pun feenap maek,

“Wi mua eena mikamik nain urufikuan.”
(Sekaraiya 12.10)

Yeesus sawi napuma pikip nomon ona-pa wuamik

(Matiu 27.57-61, Mak 15.42-47, Luk 23.50-56)

38 Aria mua oko unuma Yosep, o Yeesus opora wiar opam-ikua, nain wi Yuuda wia keker opap ariman me wame wuam-ikua. Ne aria Yeesus sawi napuma aawekam naep ikiwep Pailat nokarek. Ne Pailat eliw naakeya ikiwep sawi napuma nomokowa-pa iirarek. 39 Wiam erup Nikodemus ikos ikiwep naap onamik. Nikodemus-na iir oko uura ikiwep Yeesus urufak, mua nain. Os-ke maa tana ikin eliwa aawep feekiya ikiwok. Maa tana nain pina 30 kilo naap saarik. 40 Wiam erup sawi napuma aawep wi Yuuda wia soopimik sira nain ookami maa tana ikin eliwa nain konim kia-pa feefap nainiw sawi napuma wasiep amapikiwemik.

41 Yeesus nomokow moke-pa umok epa nain nomokow pupura nan ikua. Ne mua wia soopowa nomon ona pun nan ikua. Nain irina ikua, mua-ko nan me wuowa ikemik. 42 Wi Sabat maa enowa onowa maa muutitik saliwowa-ke naep ewuraremi nan-pariw pekap nomon ona-pa wuamik.